ورتالىق ازيادا تۇڭعىش رەت! مادەنيەت جانە سپورت مينيسترلىگىنە قاراستى «قازاقكونتسەرت» مەملەكەتتىك كونتسەرتتىك ۇيىمىندا گيننەستىڭ رەكوردتار كىتابىنا ەنگەن الەمگە ايگىلى «Notre Dame de Paris» ميۋزيكلىنىڭ قازاق تىلىندەگى نۇسقاسى قويىلادى.
الەمدىك قويىلىمعا قاتىسۋ ءۇشىن ۆوكالدىق ورىنداۋشىلارعا كاستيگ جاريالاندى. قاتىسۋشىلاردى ميۋزيكلدىڭ الەم مويىنداعان شەبەرى, «Notre dame de Paris» ايگىلى قويىلىمىنىڭ اۆتورلارىنىڭ ءبىرى ر.كوچچانتە قابىلدايدى. ميۋزيكل ر.كوچچانتەنىڭ مۋزىكانىڭ گارمونيالىق ۇندەسىمىنىڭ ارقاسىندا شەدەۆرگە اينالدى. كاستينگتە اتاقتى ماەسترومەن قاتار فرانتسيانىڭ پروديۋسەرلەرى دە قاتىسادى.
وتاندىق تالانتتارىمىزعا ايگىلى قويىلىمعا قاتىسۋ مۇمكىندىگى تۋىپ وتىر. 18-38 جاس ارالىعىنداعى ۆوكالدىق انشىلەرگە ارنالعان كاستينگ 8, 9,10 قازان كۇندەرى ساعات 9.00-دەن 19.00-گە دەيىن «قازاقستان» ورتالىق كونتسەرت زالىندا وتەدى.
«Notre dame de Paris» – الەمدىك مادەنيەتتىڭ جاۋھارىنا اينالعان ەرەكشە تۋىندى. ۋاقىت سىنىنان ءوتىپ, تالعامپاز كورەرمەننىڭ ىستىق ىقىلاسىنا بولەنگەن ميۋزيكل ەشكىمدى بەيجاي قالدىرماسى انىق. العاشقى قويىلىمىنان-اق ۇلكەن تابىسقا قول جەتكىزگەن ميۋزيكل اتاقتى كلاسسيك جازۋشى ۆ.گيۋگونىڭ رومانىندا باياندالعان شىنايى ماحاببات پەن ساتقىندىق وقيعاسى, فرانتسۋزدىق شانسون مەن سىعان موتيۆىنە قۇرىلعان اسەم اۋەزدى مۋزىكا, عاجايىپ پەن سيقىرعا تولى تسيرك جانە اكروباتتار ونەرىمەن ورنەكتەلگەن. ميۋزيكل جەلىسىندە ورىندالاتىن «Belle», «Danse mon esmeralda», «Le Temps des Cathedrales» سەكىلدى ەلۋگە جۋىق ءاننىڭ اۋەنى تىڭدارماندى بىردەن باۋرايدى. بۇعان دەيىن اتالمىش ميۋزيكل الەمنىڭ 9 تىلىنە اۋدارىلعان. ەندى, ايگىلى ميۋزيكلدىڭ كەيىپكەرلەرى قازاق تىلىندە ونىنشى بولىپ ءۇن قاتادى.
20 جىل بۇرىن العاش رەت پاريج قالاسىندا قويىلعان ميۋزيكلدىڭ قازاق ساحناسىنىڭ تورىنەن تابىلۋى ەلوردامىز استانانىڭ 20 جىلدىق مەرەيتويىمەن تۇسپا-تۇس كەلىپ وتىر. «Notre dame de Paris» ميۋزيكلىنىڭ قويىلىمى زاماناۋي قازاقستاننىڭ تاريحىنداعى ايتۋلى وقيعا بولارى انىق.